فى ظل الظروف الصعبة الكثير الى بنمر بيها فى الأيام ديه وفى ظل مشاكل إقتصادية وأزمات بتمر بيها الدول أصبحت الظروف الى بنعيشها صعبة والمشاكل المادية أصبحت أكثر نظرا لزيادة متطلبات الحياة وإرتفاع مستوى المعيشه وإرتفاع الأسعار كل ده أثر على بيوتنا بشكل كبير وبالتالى أثر على العلاقات الزوجية والمشاكل المادية فى كثير من الأحيان تؤدى لفشل وأنهيارالحياة الزوجية وصعوبة الحياة فى كثير من الأحيان وفى دراسة نشرتها مجلة الاندبندنت البريطانية إن أكثر من مليونى حالة إنفصال بين الأزواج فى بريطانيا سنة 2009 نظرا للمشاكل المادية والأزمات الإقتصادية عشان كده هو ده الموضوع الى هنا قشه معاكم المشاكل المادية وتأثيرها على الحياة الزوجية أولا لازم نعرف الأسباب الى بتؤدى للمشكلة وبعدين طرق حلها أولا نناقش الأسباب :-

  • الديون والآلتزامات : طبعا فى بداية الحياة الزوجية بيبقى الزوجين خارجين من عمل الشقة والفرح ياما مخلصين إلتزامتهم ومتزوجين أو عليهم إلتزامات لسه (بس نصيحتى لأى إثنين مقبلين على الزواج الإنتهاء من أى إلتزامات قبل الزواج لأن بعد الزواج بتظهر إلتزامات ماكنتش موجوده قبل كده) أو وجود قرض أو فيزا كل ده بيحمل على ميزانية البيت .

money-home

  • مشاكل مرتبطة بصفة البخل وخاصة عند الزوج لأنه هو المسئول عن الآنفاق وممكن يبقى ميسور الحال لكن مايمنعش يبقى عنده الصفة ديه وإنه خلفيته تربيته فى أسرة تحب الإدخار والزوجة العكس وإختلاف الطباع ده بيؤدى لكثرة الخلافات .

money-man

  • زوجة رجل مدخن :  ده بيرهق الميزانية لأنه بيستقطع جزء من المال للتدخين وده طبعا على حساب الأسرة ونفقاتها .
  • الإنفاق دون وعى  : بمعنى فى بداية الزواج الصورة مش واضحة فكل واحد بيصرف على حسب متطلباته وطبعا الستات بتموت فى الــshopping الى له لازمة والى مالهوش طبعا ولو فيه sales كله بيجرى عليه بغض النظر محتاجين الحاجات ديه ولا لأ .

money-woman

  • طبعا مشكلة مين بيشتغل ومين بيصرف المشكلة الأزليه فى الحياة الزوجيه إن الرجل هو الى بيشتغل وهو عبارة عن ماكينة فلوس والست هى الى بتصرف وهى الى مبهدلة الدنيا مصاريف .

money2

  • إخفاء الحقيقة : أثبتت الدراسات إن أكثر شئ بيقوم بيه الرجال والنساء هو إخفاء الدخل وده بيؤدى إلى شك وعلاقات مش مستقرة ومش قايمة على الثقة .
  • عدم الصراحة وعدم وجود وضوح وشفافية فى عرض المشاكل المادية دهب يؤدى لزيادتها أكيد .
  • طبعا عدم وجود قناعه بالموجود وطبعا الستات كل واحده بتشوف الثانية جابت إيه وتقلدها بغض النظر عن ظروفها وظروف زوجها إيه .
  • عمل الزوجة ودخلها وطريقة مشاركتها فى البيت بيؤدى لمشاكل مادية كبيرة .

money-woman1

  • مناقشة المشاكل المادية مع الآخرين .
  • إخفاء المشتريات عن الزوج والعكس .
  • التبذير والإسراف وعدم القدرة على عمل control هو ده من أساسيات المشكلة .
  • عدم الإحساس بالمسئوليه من جهة الزوجة تجاه متطلباتها بمعنى تقلب البيت نكد لو فيه حاجة عاوزاها وماجتش وده أكبر غلط دخول المشاكل المادية فى العلاقة الزوجيه .
  • لو فيه أطفال المتطلبات الكثير لهم واحتياجاتهم ده بيخلى فيه إرهاق كبير لميزانية البيت ومشاكل أكثر .

money-kids1

على قد ماقدرت حصرت لك الأسباب الى بتؤدى لظهور المشكلة بس كلامى ليكى أسهل مشكلة ممكن تقابلك فى حياتك الزوجية هى المشاكل المادية لأن لها حل فى القريب العاجل أو حتى البعيد الفلوس تيجى المشكلة إتحلت لآن فيه مشاكل ثانيه مالهاش علاقة بالفلوس مالهاش حل فالمشاكل المادية صدقينى مقدور عليها وسهل حلها بالصبر والمثابرة وطولة البال وأهم حاجة يبقى قلبكم على بعض عشان تعدوا المرحلة ديه .

فى المقالة القادمة هنستعرض طرق مواجهتها ومقترحات لحلها  إن شاء الله .

نهلة الجداوي

مديرة موقع لمسات جميلة
أنا إحدى مؤسسات الموقع هاوية للطبخ ومابحبش الروتين بحب التغيير والتجديد عشان نعرف نكمل حياتنا فهنحاول نغير ونجدد من مطبخنا وكمان هحاول أقدم لكم روشتات لحياة زوجية سعيدة سواء مع الزوج أو الأولاد كمان يارب اقدر أفيدكم واستفيد أنا كمان.
Share →

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>