طبعا إتكلمنا فى المقالة السابقة عن الأسباب إلى تؤدى للمشاكل المادية وعلى قد ما قدرت حصرتها لكم . المرة ديه هنتكلم عن طرق مواجهتها وحلها وهو أمر مش مستحيل بس كمان مش قليل ولا سهل إنك تقدرى تواجهى وتتغلبى على المشاكل ديه عشان تحافظى على إستقرار البيت والأسرة والإستقرار العاطفى وعلى قد ما تكون العلاقة قوية وثابتة وعلى قد ماتقربوا من بعض فى الأفكار والمشاعر كمان على قد ما تقدروا تتغلبوا على أى مشكلة مش شرط مادية فقط ولازم نعرف إن المال وسيلة وليست غاية للإعانة على الحياة مش الهدف الأساسى بتاعنا

money-23

فهنتكلم عن الحلول :-

  • وضع أولويات بالمصاريف الأهم فالمهم .
  • لازم تعرفى تحسبي وتوفرى كام للطوارئ (تعب – مرض – حادثة – سفر مفاجئ ) مهما كان مقدار الراتب لازم على جنب وضع مبلغ للطوارئ بشكل ثابت حتى لو بسيط ولا يتم الاقتراب منه لأى سبب من الأسباب ومهما كانت الظروف وتبقوا متفقين على الظرف الى تستخدموا فيه المبلغ ده .
  • التحكم فى الأمور المادية يبقى فى إيديكم أنتم الاثنين أو مع إلى بيعرف يسيطر ويضبط الميزانية ويضع جدول ويقارن بين الإيرادات والمصروفات عشان تقدروا تكتشفوا الخلل فين وتقدروا تتحكموا فيه .
  • مناقشة الطرق الممكنة للتوفير وترشيد الاستهلاك خاصة فى متطلبات البيت من أكل وشرب ولبس يعنى الوسطية فى الإنفاق كما ذكر في قوله تعالى “ولا تجعل يدك مغلولة إلى عنقك ولا تبسطها كل البسط فتقعد ملوما محسورا” .
  • الحوار والتعاون بينكم يقدر يتغلب على أى مشكلة طالما الحوار قائم ومتصل لأن مافيش حياة مافيهاش مشاكل الجنة بس هى إلى مش فيها غير كده كل الحياة مشاكل والمشاكل ديه لو إتواجهت صح بتزيد من قوة وثبات العلاقة بين الزوجين فدايما أحسنى التصرف  وأعملى بالحكمه ديه

money-21

  • التخطيط والتنظيم المالى ولازم الزوجة تعرف كل حاجة عشان تعرف تمشى على الخطة مضبوط وترشد نفقاتها وترتب أولوياتها .
  • الصدق والصراحة فى أى علاقة يؤدى لنجاحها وعشان العلاقة تبقى سوية لازم الشفافية والوضوح فى كل شئ خاصة بالنواحى المادية ولازم الرؤية تبقى واضحة خاصة بالنسبة للزوجة لأن دايما أوجه الصرف هى الى بيبقى فيها المشاكل .
  • الرضا بالموجود والقناعه هى ديه السعادة الحقيقية ودايما بصى على الموجود معاكى واحمدى ربنا عليه وأخطر حاجة إن الواحد يحاول يقلد حد أو يعمل زى أى حد بغض النظر عن ظروفك وأحوالك .

money-24

  • طبعا الزوج والزوجة كل واحد ذمة ماليه منفصلة عن التانى خاصة لو الزوجة بتشتغل فلازم تبقوا متفقين الدنيا تمشى إزاى وأوجه الصرف داخل البيت إزاى وطرق المشاركة إزاى .
  • المساواة فى النفقات وعدم تمييز طرف عن الآخر كما فى حديث الرسول صلى الله عليه وسلم “أن تطعمها مما طعمت وتكسوها مما إكتسيت ” وإنتى كمان ماتحمليهوش فوق طاقته أو مقدرته كم ذكر فى قوله تعالى “لينفق ذو سعه من سعته ومن قدر عليه رزقه فلينفق مما أتاه الله لا يكلف الله نفسا إلا ما أتاها سيجعل الله بعد عسر يسرا ” .
  • طبعا لمواجهة مشكلة البخل مافيش غير حل واحد عطاء مادى ومعنوى كثير من غير ما تستني مقابل مرة على مرة هتنتهى المشكلة .
  • وضع أهداف مستقبلية لأفراد العائلة كلهم وخطة للوصول للهدف وحماس لتحقيقه هيخلى الحافز موجود دايما للتحكم فى الميزانيه .
  • طبعا الوصفة السحرية لزيادة الرزق كثرة الإستغفار – التوكل على الله – بر الوالدين – صلة الرحم – الحمد والشكر – الصدقة ودايما الواحد يطلب البركة فى الرزق مش سعة الرزق فقط .

على قد ماقدرت ناقشت طرق لمواجهة المشاكل المادية وحلولها والكلام ليكى المرة ديه لأن الزوجة عمود ومفتاح البيت طالما زوجك كويس ويستاهل أى مشكلة مقدور عليها وتقدروا تواجهوها مع بعض وعلى قد ما يبقى قلبك على بيتك ومصلحة زوجك هتلاقى ربنا هيباركلك فى كل حاجة والعلاقة بينكم هتبقى قوية ومحدش يقدر يخترقها بسهولة والزوجة القوية الى يبقى عنها القدرة إنها تتحكم فى الفلوس مش هى الى تتحكم فيها وكل حاجة هتيجى ومافيش حاجة بتخلص كله موجود شوية شوية وشوية صبر ومثابرة وشوية جدعنه كثيرمن بتوع الستات الجدعه هتلاقى المواضيع عدت وتبقى ذكريات تحكيها لولادك لما يكبروا عن المواقف الى إتعرضتى لها فى حياتكم وواجهتهوا إزاى .

money-22

ربنا يوسعها عليكم وعلينا ويبارك فى رزقكم ومستنية مشاركتكم وأرائكم وأفكاركم كمان فى مواجهة الحياة الصعبة الى بنعيشها على صفحتنا على الفيس بوك

نهلة الجداوي

مديرة موقع لمسات جميلة
أنا إحدى مؤسسات الموقع هاوية للطبخ ومابحبش الروتين بحب التغيير والتجديد عشان نعرف نكمل حياتنا فهنحاول نغير ونجدد من مطبخنا وكمان هحاول أقدم لكم روشتات لحياة زوجية سعيدة سواء مع الزوج أو الأولاد كمان يارب اقدر أفيدكم واستفيد أنا كمان.
Share →

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>